सोनू मिश्रा का राजस्थानी गीत मोजड़ी को टीजर रिलीज

राजस्थानी गीत मोजड़ी को टीजर यू ट्यूब पर रिलीज होयो है। ईं गीत की खास बात या छे कि ई में राजस्थानी अर हिंदी फिल्मां को हीरो सोनू मिश्रा दीखेलो। ईं गाणां में ऊंकी जोड़ीदार छे एक्ट्रेस गुंजन बजाज।

टीजर में आपणों जैपर और भी रुपाळो लाग रियो छे। हवा मैल को तो खैणों ई कांई। मोजड़ी गीत बन्ना अर बन्नी का प्यार को मीठो गुळकंद छे। गीत में बन्नी अपणा बन्नां स्यूं फोन पर जैपुर की मोजड़ी ल्याबा के लिए खे री छे। जवाब में बन्नों खे छे कि मोजड़ी कांई थे कह द्यो तो हवा मैल ले आऊं। ईं छोटी सा बातचीत स्यू ईं पूरा गीत को भाव समझ में आ रियो छे। आखिर में गाणां की बस एक लाइन छे...जैपुर स्यूं मोजड़ी...। टीजर ने देख अर लाग रियो छे कि जैपर ईं में जबरदस्त दीखबा वाळो छे।

सोनू मिश्रा राजस्थानी फिल्म भक्त धन्ना जाट, म्हारा श्याम धणी दातार अर एजुकेटेड बीनणी में काम कर चुक्यो छे। ईं के अलावा थोड़ा दिनां पैली आई हिंदी फिल्म रिजवान में भी सोनू मिश्रा छो। सोनू टीवी पर भी घणां ई सीरियलां में काम कर चुक्यो छे।
सोनू बतायो कि लॉक डाउन चाल रियो छे तो गांव आयोड़ो छूं। कलाकार छां तो ठाला तो क्यान बैठां तो मोजड़ी बणा लियो। अतरा संसाधन तो कोने छा अठे पण फेर भी मुंबई को अनुभव काम आयो। राजी हो बाळी बात या छे कि लोगां ने गीत को टीजर खुब पसंद आ रियो छे।